«I ei uroleg tid er eit sterkt og velfungerande politi av stor betydning»

Verda er blitt endå meir uroleg etter siste vekes hendingar i USA. Det som skjer skapar uro rundt økonomiske forhold og usikkerheit om amerikanske tryggingsgarantiar ovanfor Ukraina og Europa. 

Europeiske leiarar jobbar no på spreng for å oppretthalde relasjonen til USA, finne vegen til fred i Ukraina, og varslar massiv opprusting.

Vår rolle er viktig. Norsk politi bidreg kvar dag til å skape tryggleik i samfunnet. Eit sterkt og velfungerande politi er av stor betydning for samfunnets motstandskraft. 

I ei tid som denne er trygge lokalsamfunn, minst mogleg polarisering, tillit mellom styresmakter og innbyggjarane særleg viktig.

Meir enn Forsvaret

Tryggleik og sikkerheit handlar om meir enn det militære forsvaret. Å ivareta tryggleik krev at vi nyttar alle tilgjengelege verktøy. 

Trusselvurderingane er tydelege på at Russland og andre statar nyttar seg av sabotasje og anna forstyrrande verksemd ovanfor andre statar, slik som til dømes kriminelle som handlar på oppdrag av statar eller interessentar.

Politiets bidrag til situasjonsforståing er særleg viktig. Politiet har mange auge, øyrer og stor kontaktflate mot befolkninga.

Ei tydeleg rolle

Vi har ei tydeleg rolle i førebygging og handtering av samansett verkemiddelbruk. Kva som har skjedd og kven som står bak uønskte hendingar kan vere krevjande å fastslå. 

Politiet vil måtte halde i sakene heilt til det blir avklart om eventuelt PST skal overta. I dei færraste tilfella skjer dette. 

Det er likevel særs viktig at informasjon om potensielt tryggleikstrugande hendingar blir samla inn gjennom vår etterretningsoperasjon «Sølvblikk» og at vi samarbeider om ei felles nasjonal situasjonsforståing.

Politiet i krig

Vi følgjer opp hovudmålet til totalberedskapsmeldinga om at sivilsamfunnet skal førebu seg på kriser høgt i spekteret. 

Politiets rolle i krig er definert i eige rundskriv frå 2024. Det betyr ikkje at vi har alle planane på plass. Det blir jobba med å etablere eit nødvendig fundament for lokal planlegging for heile krisespekteret. 

Fleire og fleire vil bli involvert og informert, slik som sentrale nettverk i politidistrikt og særorgan.

Vi må kontinuerleg arbeide for å styrke vår evne innanfor den kapasiteten vi har. Det er også sett inn ekstra ressursar, til dømes retta mot ulike tiltak for å styrke grenseovervaking.

Komplekse truslar

Eg er klar over at arbeidsmengda opplevast stor og truslane komplekse. I Politidirektørens faglege råd er det formulert slik: 

«I arbeidet med å styrke samfunnets beredskaps- og forsvarsevne må det takast omsyn til politiets sentrale rolle, og korleis den forverra tryggleikspolitiske situasjonen påverkar politiets oppgåveportefølje.»

Det er nødvendig at styrking av sivil beredskap skjer i takt med styrkinga av Forsvaret. 

Behovet for eit teknologisk løft i politiet er også særleg framheva i dette rådet. 

Eg vil arbeide for at tilrådingane i politifagleg råd skal bli ein realitet. Dette betyr også fokus på det tverrsektorielle og internasjonale samarbeidet.

Takk for aktsemd og innsats kvar dag i heile politi-Noreg. 

Det er krevjande tider på «vår vakt», men saman har vi mykje styrke.